Diwrnod 106: Gweddïo dros Treganna Caerdydd (1979)

Diwrnod 106 o 150 Diwrnod o Weddi.

• 'Haleliwia! Diolchwch i’r Arglwydd! Mae e mor dda aton ni; Mae ei haelioni yn ddiddiwedd' (Salm 106:1).

1979

Yn y llyfr: Forth in Thy Name: A History of Cardiff Canton Corps 1879-1979, mae Keith Griffin yn nodi’r dystiolaeth ganlynol gan Mrs Annie Jarvis, y milwr cyntaf ar restr y corfflu: 

‘Mae’n fraint i mi anfon fy nghyfarchion a’m tystiolaeth atoch ar gyfer canmlwyddiant corfflu Treganna. Dyma ble rhoddais fy nghalon i’r Arglwydd yn ddeng mlwydd oed. Roedd hynny 75 o flynyddoedd yn ôl, ond mae atgof y noswaith honno dal gen i. Y diwrnod canlynol roeddwn i mor hapus ac roedd yn rhaid i mi ddweud wrth fy ffrindiau ysgol am bopeth, ond doedden nhw ddim yn deall yr hyn roeddwn i’n siarad amdano. Ers y Sul hwnnw ym mis Tachwedd, dw i wedi ymdrechu i ddilyn Iesu ac er i mi fethu weithiau, dw i wedi bod yn sicr o’i gariad a’i drugaredd. 

‘Sut allaf ddiolch i Dduw am f’achub trwy gydol holl ddigwyddiadau fy mywyd? Dw i wedi profi llawenydd a hapusrwydd - tristwch a siom, fel sy’n digwydd i bawb. Ond gydag Iesu wrth f’ochr dw i wedi gallu mwynhau’r hapusrwydd ac yn ystod y tristwch dw i wedi teimlo ei freichiau yn dynn amdanaf yn fy nghefnogi. Mae’n rhaid i mi sôn hefyd am yr holl gyfleoedd dw i wedi cael i dystio trwy wisgo iwnifform Byddin yr Iachawdwriaeth. Dw i a’m gŵr wedi bod mor ffodus i weithio gyda phobl ifanc hefyd.

‘Nawr, yn fy henaint, dw i’n colli pobl imi garu a ffrindiau roeddwn i wedi rhannu cyfeillach gyda hwy  ond hyd yn oed yn ystod cyfnodau o unigedd dw i’n gwybod bod yr Arglwydd yn agos. Dw i’n ddiolchgar iawn iddo, mae’n rhaid i mi ddweud “Diolch, Duw.”

‘Iddo ef y bo’r clod! Gweddïaf y bydd Duw yn bendithio ein corfflu yn y dyfodol, fel y mae wedi’i wneud yn y gorffennol.’ 

Gweddi

• Ar ôl ichi ddarllen tystiolaeth Mrs Annie Jarvis, ystyriwch y foment ichi roi eich calon i Iesu a diolchwch iddo am ei gariad diamod.
• Gweddïwch dros Dreganna Caerdydd, y bydden nhw’n cael eu bendithio ac y bydden nhw’n clodfori Duw ym mhopeth maen nhw’n eu gwneud.